ಡಾಲರ್ ಎದುರ ಚೇತರಿಸಿಕೊಂಡ ರೂಪಾಯಿ ; ಅಮೆರಿಕ–ಇರಾನ್ ಉದ್ವಿಗ್ನತೆಯ ನಡುವೆ ಡಾಲರ್ ಎದುರು ರೂಪಾಯಿ ₹91.57ಕ್ಕೆ ಚೇತರಿಕೆ!

ನವದೆಹಲಿ, ಮಾರ್ಚ್ 5:

ಮಧ್ಯಪ್ರಾಚ್ಯದ ಉದ್ವಿಗ್ನ ಪರಿಸ್ಥಿತಿಯ ನಡುವೆಯೇ ಭಾರತೀಯ ರೂಪಾಯಿ ಬುಧವಾರ ಡಾಲರ್ ಎದುರು ಸುಮಾರು 50 ಪೈಸೆ ಏರಿಕೆ ಕಂಡು ₹91.57 ಮಟ್ಟದಲ್ಲಿ ವ್ಯಾಪಾರ ನಡೆಸಿತು. 

ಇತ್ತೀಚೆಗೆ ರೂಪಾಯಿ ತನ್ನ ಇತಿಹಾಸದಲ್ಲೇ ಅತೀ ಕಡಿಮೆ ಮಟ್ಟವಾದ ₹92 ದಾಟಿದ ನಂತರ ಈ ಚೇತರಿಕೆ ಗಮನ ಸೆಳೆದಿದೆ.

ಮಾರುಕಟ್ಟೆ ವಲಯದ ಮಾಹಿತಿಯ ಪ್ರಕಾರ, ಅಮೆರಿಕ–ಇರಾನ್ ಸಂಘರ್ಷದ ಹಿನ್ನೆಲೆ ಜಾಗತಿಕ ಕಚ್ಚಾ ತೈಲ (crude oil) ಬೆಲೆ ಏರಿಕೆಯಾಗಿ ರೂಪಾಯಿ ಮೇಲೆ ಒತ್ತಡ ಉಂಟಾಗಿತ್ತು. 

ಭಾರತ ತನ್ನ ಇಂಧನ ಅವಶ್ಯಕತೆಗಳ ಬಹುಪಾಲನ್ನು ಆಮದು ಮಾಡಿಕೊಳ್ಳುವುದರಿಂದ ತೈಲದ ಬೆಲೆ ಏರಿಕೆ ರೂಪಾಯಿ ಮೌಲ್ಯಕ್ಕೆ ನೇರ ಪರಿಣಾಮ ಬೀರುತ್ತದೆ.

ಆದರೆ, ಬುಧವಾರ ಬೆಳಿಗ್ಗೆ ವಿದೇಶಿ ವಿನಿಮಯ ಮಾರುಕಟ್ಟೆಯಲ್ಲಿ ಡಾಲರ್ ಮಾರಾಟ ಹೆಚ್ಚಳ ಮತ್ತು ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಮಧ್ಯಪ್ರವೇಶದ ನಿರೀಕ್ಷೆಯಿಂದ ರೂಪಾಯಿ ಮೌಲ್ಯದಲ್ಲಿ ಸುಧಾರಣೆ ಕಂಡುಬಂದಿದೆ ಎಂದು ವ್ಯಾಪಾರಿಗಳು ತಿಳಿಸಿದ್ದಾರೆ.

ತಜ್ಞರ ಅಭಿಪ್ರಾಯದಂತೆ, ಮಧ್ಯಪ್ರಾಚ್ಯದ ಯುದ್ಧ ಪರಿಸ್ಥಿತಿ ಮತ್ತು ಕಚ್ಚಾ ತೈಲದ ಬೆಲೆಗಳಲ್ಲಿ ಇರುವ ಅಸ್ಥಿರತೆ ಮುಂದಿನ ದಿನಗಳಲ್ಲಿ ರೂಪಾಯಿ ಚಲನವಲನವನ್ನು ನಿರ್ಧರಿಸಬಹುದು.

ಅಮೆರಿಕ–ಇರಾನ್ ಸಂಘರ್ಷದ ಪರಿಣಾಮದಿಂದ ಒತ್ತಡಕ್ಕೆ ಒಳಗಾದ ರೂಪಾಯಿ, ಬುಧವಾರ 50 ಪೈಸೆ ಚೇತರಿಸಿಕೊಂಡು ಡಾಲರ್ ಎದುರು ₹91.57ಕ್ಕೆ ಏರಿಕೆಯಾಯಿತು.